உயரம்

உயரம்
தமாம் பாலா

யானை படுத்திருந்தாலும்
ஏனைய பிற விலங்கினும்
தானே உயர்ந்து காணும்

உருவத்தில் உயர்ந்தவன்
உயரத்தில் குறைந்தவன்
இதில் சிறந்தவன் எவன்

அழகுத் தமிழில் இதற்கு
புழக்கத்தில் இருக்கின்ற
பழமொழிகள் பலவுண்டு

சாண்பிள்ளை ஆனாலும்
ஆண்பிள்ளையே என்றும்
கள்ளனைக் கூட நம்பலாம்

குள்ளனை மட்டும் நம்பாதீர்
தெள்ளத் தெளிவாய் இவர்
அள்ளித் தெளித்திட்ட பதர்

வெறும் சொல் அலங்காரம்
தரையில் கிடந்து உறங்கிட
தலையும் காலும் சம உயரம்

சம்மணத்தில் சற்று  உயரம்
மண்டியிட மிதமான உயரம்
எழுந்து நடக்க நகர்ந்திடவும்

ஓடவும் உழைக்கவும் வாழ்வும்
உயரும் பிறர் துயரம் தீர்க்கும்
உள்ளம் என்றும் வளர்ந்திடும்

தென்னை பனை மர உயரம்
தன்னையே தந்தும் மகிழும்
அன்னை மனம் வானுயரம்