அல்லது

அல்லது
தமாம் பாலா

நல்லது எது கெட்டது எது
அல்லதாய் இருப்பது எது
இல்லாதது கேள்வி இது
இதற்கும் பதில்தான் எது

பாகற்காய் கசக்கும் வரை
சீனி இனிக்கும் வரையில்
கத்தி வெட்டும் வரையில்
நாகம் படமெடுக்கும் வரை

மிளகாய் உறைக்கும் வரை
தேனது தித்திக்கும் வரை
நட்பு சுற்றம் உதவும் வரை
கூடி ஒன்றி இருக்கும் வரை

எல்லாமே நல்லது அதனது
சுயத்தை நிலை நிறுத்தும்
வரை உயிர்த் துடிப்போடு
செயல்படும் வரை நல்லது

இரப்பதுவும் இறப்பதுவும்
மறப்பதுவும் மறுப்பதுவும்
மறைப்பதும் கெடுப்பதும்
குரைப்பதும் குறைப்பதும்

நல்லது அல்லது கெட்டதும்
நமது பார்வையில் உள்ளது
வெயிலுக்கு நிழல் நல்லது
வளர்ச்சிக்கு அது கெட்டது