தூய அன்பு

தூய அன்பு
தமாம் பாலா

தாயன்பு தன் பிள்ளையை
தாலாட்டி பாலூட்டி சீராட்ட
சேயன்பு தாய் தந்தையை
சேவித்து நன்றி செலுத்த

உறவுகள் காட்டும் அன்பில்
உறையும் பொது நலத்தில்
உண்டு சுயநலம் துளியாய்
உண்மையான யதார்த்தம்

வளர்ப்புப் பிராணி மட்டும்
அளவிலா எதிர்பார்ப்பிலா
அன்பை மனிதரிடம் தரும்
அதில் இல்லை கலப்படம்

தானாடாவிட்டாலும் தனது
தசையாடும் என்பார் நேச
நாய் ஆடாவிடினும் அதன்
வாய் பேசாவிடினும் வால்

ஆடும் என்பதையும் அறிவீர்
ஈடு இணையில்லாத நன்றி
மிக்க தூய அன்பை போற்றி
தக்க மதிப்பைத் தந்திடுவீரே